Miðstöð foreldra og barna
Árið 2008 stofnuðu nokkrir sérfræðingar Miðstöð foreldra og barna (MFB) sem ætlað er að meðhöndla vanlíðan mæðra og efla samband þeirra við börn sín (0-5 ára) og þar með þroska og velferð barnanna. Um er að ræða nýjung hér á landi þar sem sérhæfð meðferðarúrræði í geðheilbrigðisþjónustu fyrir foreldra og börn þeirra undir 5 ára aldri hafa ekki verið til staðar. Ung börn eru í sérstakri áhættu ef foreldrar glíma við geðheilsuvanda eða fíkn, voru sjálfir vanræktir eða misnotaðir sem börn, eru óþroskaðir og njóta lítils stuðnings fjölskyldu, búa við fátækt eða heimilisofbeldi. Viðvarandi streita ungra barna skaðar heilann og dregur úr vexti hans, veikir ónæmiskerfið og mótstöðuafl líkamans gegn langvinnum heilsufarsvandamálum fram á fullorðinsár og hamlar félags- og tilfinningalegum þroska. Stór hópur foreldra og barna þarf meiri og sérhæfðari aðstoð en grunnþjónusta heilsugæslu veitir án þess að eiga erindi á geðdeild.
Starfsemin hefur verið fjármögnuð af styrkjum frá félagasamtökum, stofnunum og fyrirtækjum en nú hefur Velferðarráðuneytið tryggt rekstrarframlag til tveggja ára. Starfsemin flutti nýlega aðsetur sitt í húsnæði SÍBS að Síðumúla 6 en var áður í Mosfellsbæ.
Markhópur MFB hefur fengið ýmsa þjónustu víðs vegar í kerfinu en hún er ekki sambærileg við þá meðferð sem veitt er hjá MFB. Um er að ræða þjónustu sem er nauðsynleg og löngu tímabær í íslensku samfélagi. Í mörgum nágrannalöndum okkar hefur slík þjónusta verið í uppbyggingu sl. 15-20 ár og er lengst komin á Norðurlöndunum, t.d. Finnlandi og Danmörku ásamt Bretlandi og Skotlandi. Víða hefur verið komið á fót meðferðarúrræðum sem snúa að því að greina geðheilsu- og tengsla-vanda snemma til að auka líkur á að hægt sé að draga úr millikynslóða-flutningi geðheilsuvanda.
Frekari upplýsingar um Miðstöð foreldra og barna má nálgast á vefsíðunni www.fyrstutengsl.is
