Stuðlar innleiða Motivational Interviewing
Rannsóknir hafa leitt í ljós að aðferð sem kallast Áhugahvetjandi samtal (Motivational Interviewing) ber árangur í ráðgjöf, bráðaþjónustu og meðferðarvinnu með unglingum sem glíma við hegðunar- og vímuefnavanda. Aðferðin hefur haft mikil áhrif á skilning og aðferðir fagfólks í meðferðarvinnu með fullorðnum og unglingum sem eru í þörf fyrir breytingar á lífsstíl eða hegðun. Þessara áhrifa hefur einnig gætt á Stuðlum um langt skeið en í tengslum við yfirstandandi breytingar á starfseminni verður aðferðin nú innleidd þar með kerfisbundnari hætti en áður. Hafa starfsmenn á lokaðri deild og meðferðardeild setið ítarlegt þjálfunarnámskeið þar sem einnig er fjallað um kóðun á samtalsbútum og kóðunarkerfið MITI sem tryggir gæði í framkvæmdinni og að aðferðin sé notuð rétt. Stuðlar hafa áður innleitt svokallaða ART-þjálfun (Aggression Replacement Training) í félagsfærni, sjálfstjórn og siðferðilegri rökræðu. Bæði Áhugahvetjandi samtal og ART heyra til viðurkenndra grunnaðferða í meðferð unglinga með hegðunar- og vímuefnavanda.Áhugahvetjandi samtal er gagnreynd aðferð og sérstaklega sniðin að skjólstæðingum sem hafa ekki komið auga á þörf fyrir breytingar, eru alfarið á móti breytingum eða hafa íhugað breytingar en eru á báðum áttum hvort og hvaða leið þeir geta farið. Mikilvægt einkenni Áhugahvetjandi samtals er að forðast ákveðnar gildrur í samtalinu sem ýta undir mótþróa og draga úr vilja til breytinga. Aðferðin miðar að því að virkja vilja skjólstæðings til jákvæðra breytinga á lífsstíl og hegðun, mæta skjólstæðingi þar sem hann er staddur og laða fram og ýta undir hugsanir og tillögur hans sjálfs um jákvæðar breytingar. Sjá nánar hér.
