Úrræði fyrir börn og unglinga í Reykjanesbæ

9 mar. 2010

Barnavernd Reykjanesbæjar hefur farið af stað með þróunarverkefnið "Baklandið" sem er að danskri fyrirmynd og snýst um að aðstoða börn eftir skóla, við heimanám, samskipti og athafnir daglegs lífs. Starfsemin hófst í febrúar 2010 og er markhópurinn börn og unglingar á aldrinum tíu til fimmtán ára sem búa við erfiðar heimilisaðstæður. Um er að ræða þjónustu tvisvar í viku eftir skóla fyrir 4-5 börn í senn. Nokkur sveitarfélög eru með unglingaathvörf, unglingasmiðjur og stuðning af ýmsu tagi við börn sem búa við erfiðar heimilisaðstæður. Það var vísir að slíku í Reykjanesbæ en fyrirkomulag Baklandsins er með öðrum hætti og nýjung hér á landi að mati aðstandenda verkefnisins (Morgunblaðið, 28. febrúar 2010).