Aukning vímuefnaneyslu hjá unglingum sem koma til meðferðar
Ef bornar eru saman upplýsingar um vímuefnanotkun 285 unglinga á aldrinum 13-17 ára á meðferðardeild Stuðla síðastliðin 6 ár, annars vegar á þriggja ára tímabili 2000-2002 og hins vegar á þriggja ára tímabil 2003-2005, kemur í ljós að ekki dregur úr vímuefnaneyslu þessa hóps. Þvert á móti fjölgar þeim frá árinu 2003 sem hafa notað áfengi og kannabisefni oftar en tvisvar. Fjölgunin á sér aðallega stað meðal yngri barna á aldrinum 14-15 ára. Á báðum tímabilum, þ.e. 2000-2005, verður vart við kynjamun, því marktækt fleiri stúlkur en piltar höfðu notað áfengi, amfetamín, kókaín og ýmis læknislyf oftar en tvisvar.Þessar niðurstöður gefa vísbendingar um að sá hópur unglinga sem á annað borð neytir fíkniefna hafi haldist nokkuð stöðugur undanfarin ár og að neysla ákveðinna efna aukist. Svipaðar vísbendingar koma fram í rannsókn Lýðheilsustöðvar og Háskólans á Akureyri um heilsu og lífskjör grunnskólanema. Upplýsingar um minnkandi hóp unglinga sem fiktar við vímuefni einhverntíma á ævinni eiga því ekki við þá unglinga sem nota vímuefni að staðaldri eða koma til meðferðar. Vandi þeirra barna sem koma á Stuðla er oftast samsettur úr mörgum þáttum sem hafa haft áhrif yfir lengri og skemmri tíma. Ekki hafa öll börn sem koma á Stuðla notað vímuefni og misjafnt er hversu stóran þátt vímuefni leika í vanda þeirra. Í flestum tilvikum hafa greinilegir áhættuþættir verið undanfari vímuefnaneyslunar (sjá nánar fyrirlestur Halldórs Haukssonar hér).