Sérfræðingar funda um Barnahús
Í gær hófst fundur sérfræðinga frá aðildarríkjum Eystrasaltsráðsins um rannsóknir í kynferðisbrotamálum og starfsaðferðir Barnahúss. Eins og kunnugt er hefur verið mikill áhugi á að taka upp “íslenska módelið” erlendis eins og Barnahúsið er gjarna nefnt. Svíar hafa ákveðið að fyrir lok ársins verði sex slík hús starfandi og Norðmenn opna sitt fyrsta í lok ársins. Á fundinum í gær var upplýst að unnið er að því að setja barnahús á laggirnar í Árósum í Danmörku svo og í Litháen.Fundurinn hófst með ávarpi Jóns Kristjánssonar félagsmálaráðherra og mun fundurinn standa í tvo daga. Þátttakendur eru 30 frá 11 löndum en á ráðstefnunni verða flutt erindi frá sérfræðingum á þessu sviði frá flestum landanna. Erindin lúta að rannsóknarviðtölum við börn, réttindum barna við meðferð kynferðisbrotamála í réttarvörslukerfinu, læknisrannsóknum, samvinnu stofnana o.fl.
Fundurinn er samvinnuverkefni Barnaverndarstofu og samstarfsnefndar Eystrasaltsráðsins í málefnum barna “Children at Risk”, en íslensk stjórnvöld höfðu lagt til að hann yrði haldinn hér á landi af því tilefni að Ísland fer nú með formennsku í samstarfi Eystrasaltsríkjanna. Í síðustu viku var jafnframt haldinn stjórnarfundur í samstarfsnefndinni “Children at Risk” og var fundurinn haldinn á Barnaverndarstofu.
