Kynhegðun ungs fólks á Íslandi og kynferðisleg misnotkun á börnum
Barnaverndarstofa og Rannsóknir og greining/Háskólanum í Reykjavík kynntu í dag helstu niðurstöður könnunar um kynhegðun ungs fólks og kynferðislega misnotkun. Könnunin tók til nemenda í öllum framhaldsskólum á Ísland og byggir hún á svörum tæplega 10500 nemenda. Aldrei fyrr hefur verið gerð jafn umfangsmikil könnun á þessu viðfangsefni á svo stóru úrtaki á Íslandi.Á blaðamannafundinum í dag lagði Bragi Guðbrandsson forstjóri Barnaverndarstofu áherslu á fjögur atriði sem hæst bera í niðurstöðum rannsóknarinnar:
Í fyrsta lagi gæfu þær til kynna að tíðni kynferðislegrar misnotkunar, um 13.5% stúlkna og 2.% drengja væru mun lægri en þær tölur sem hefðu áður verið í umræðunni. Skýringar á því taldi hann líklegastar að fyrri kannanir hafi ekki einskorðast við upplýsingar um kynferðislegt ofbeldi heldur hefðu jafnframt tekið til kynferðislegrar áreitni.
Í öðru lagi væri athyglisvert að fjöldi þeirra ungmenna sem byrjuðu að lifa kynlífi fyrir 15 ára aldurinn væri ekki stór. Ennfremur væri athyglisvert að meirihluti stúlkna á framhaldsskólaaldir teldu að hækka bæri kynferðislegan lögaldur úr 14 í 15 ár, sem túlka mætti sem kröfu um aukna vernd.
Í þriðja lagi væri ástæða til að hafa áhyggjur af mikilli klámneyslu drengja á framhaldsskólaaldri, en fram kemur að um 37% þeirra horfðu á klámefni oftar en þrisvar sinnum í viku. Könnunin gefur vísbendingar að þessi notkun á klámi geti haft afgerandi áhrif á viðhorf ungmenna til heilbrigðs kynlís.
Loks taldi Bragi að þær upplýsingar sem fram komu í könnuninni bentu til að líkamlegt ofbeldi á heimilum væri mun útbreiddara en ætla mætti, t.d. af tilkynningum til barnaverndarnefnda.
Bragi lagði áherslu á að niðurstöður könnunarinnar gætu komið að miklum notum fyrir foreldra, barnaverndaryfirvöld, stjórnvöld og alla þá sem láta sig málefni barna varða. Fyrirhugað er að vinna enn frekar úr niðurstöðum könnunarinna.
Hér má sjá helstu niðurstöður sem kynntar voru í dag.
