Starfsdagar meðferðarheimila Barnaverndarstofu
Dagana 21. og 22. okt. 2004 voru haldnir árlegir starfsdagar meðferðarheimila Barnaverndarstofu og Stuðla. Að undirbúningi starfsdaganna stóðu meðferðarheimilin Árbót og Laugaland ásamt starfsmanni Barnaverndarstofu. Starfsdagarnir fóru fram í frábæru veðri í Eyjafirðinum, nánar tiltekið í Sveinbjarnargerði. Til fundarins mættu alls 33 starfsmenn - en aldrei fyrr hefur verið jafn vel mætt. Skýringin á þessari góðu mætingu var að allir starfsmenn meðferðarheimilisins Háholts mættu og jafnframt komu nokkrir starfsmenn frá Laugalandi og Árbót/Bergi utan rekstraraðilanna.Umræðuefni fundarins var staðan í dag í meðferðarstarfinu og framtíðin - þarf að breyta og þá hverju og hvenær. Kristján Kristjánsson prófessor við Háskólann á Akureyri hélt fyrirlestur um þjóðfélagsbreytingar síðustu áratuga frá sjónarhóli barna. Bryndís S. Guðmundsdóttir starfsmaður Barnaverndarstofu hélt fyrirlestur um niðurstöður rannsókna og framtíðarsýn í meðferðarstarfi. Þá tjáði hvert heimili fyrir sig og Stuðlar um framtíðarsýn sína og létu í ljós skoðanir um hverju þyrfti að breyta - hvað vilja menn sjá t.d. eftir 5 ár. Forstjóri Barnaverndarstofu gerði grein fyrir því helsta sem væri á döfinni og að hverju þyrfti að vinna á næstunni. Unnið var í hópum með framkomnar upplýsingar og skiluðu hóparnir niðurstöðum.
Góður samstarfsandi ríkti á fundinum og bjartsýni varðandi framtíðina og voru menn opnir fyrir því að gera breytingar í samræmi við faglegar kröfur. Nánar verður sagt frá niðurstöðum fundarins þegar unnið hefur verið úr öllum gögnum og fundarritun.
