Reglugerð um fóstur

12 okt. 2004

Félagsmálaráðuneytið hefur sett nýja reglugerð nr. 804/2004 um fóstur, að fengnum tillögum Barnaverndarstofu. Þessi reglugerð leysir af hólmi reglugerð um ráðstöfun barna í fóstur nr. 532/1996. Í reglugerðinni er að finna skilgreiningar á mismunandi tegundum fósturs, þ.e. tímabundnu fóstri, styrktu fóstri, reynslufóstri og varanlegu fóstri. Þá er gerð grein fyrir því hvernig sótt er um og veitt leyfi til að gerast fósturforeldri. Samkvæmt reglugerðinni ber umsækjanda að sækja námskeið á vegum Barnaverndarstofu áður en leyfi er veitt. Markmiðið með námskeiði er annars vegar að leggja mat á hæfni umsækjanda og hins vegar að veita umsækjanda nauðsynlega þjálfun og undirbúa hann undir hlutverk sitt. Barnaverndarstofa styðst við svokallað Foster Pride kerfi á þessum námskeiðum. Í reglugerðinni er einnig fjallað er um ráðstöfun barns í fóstur, fóstursamninga, lok fósturs, eftirlit og ábyrgð.