112: Sameiginleg símsvörun vegna móttöku tilkynninga
Á árinu 2001 aflaði Barnaverndarstofa upplýsinga hjá barnaverndarnefndum landsins um símanúmer vegna barnaverndarmála sem kunna að koma upp um kvöld og helgar. Athugunin leiddi í ljós að víða voru slík símanúmer ekki fyrir hendi sem augljóslega getur torveldað almenningi að tilkynna til barnaverndarnefndar grun um brot á barnaverndarlögum utan dagvinnutíma. Í ljós kom jafnframt að víða um landið hafa barnaverndarnefndir alls ekki skráð símanúmer til mótttöku barnaverndartilkynninga, jafnvel að degi til.Í því skyni að auðvelda almenningi að koma á framfæri tilkynningum til barnaverndarnefnda leitaði Barnaverndarstofa til forsvarsmanna Neyðarlínunnar, 112, um möguleika á að fyrirtækið tæki við tilkynningum, annað hvort með því að framsenda símtalið til viðkomandi barnverndarnefndar eða með því að skrá það niður. Í slíkum tilvikum er hugmyndin að starfsmenn 112 meti alvarleika þeirra og ákveði á grundvelli slíks mats hvort þeim verði komið strax á framfæri til starfsmanns barnaverndarnefndar eða hvort beðið verði til næsta virka dags.
Í upphafi ársins sendi Barnaverndarstofa bréf til allra barnaverndarnefnda landsins til að kanna vilja þeirra til þessarar hugmyndar. Í svörum meirihluta þeirra kemur fram áhugi á þátttöku.
Á síðustu mánuðum hefur verið unnið að undirbúningi verkefnisins. Öllum barnaverndarnefndum landsins var nýlega boðið til vettvangsheimsóknar þar sem starfsemi Neyðarlínunnar var kynnt.
Á næstu vikum verður haft samband við þær nefndir sem sýnt hafa áhuga á verkefninu til að kanna hvernig fyrirkomulagi á móttöku tilkynninga verði best háttað. Vonast er til að verkefnið komist til framkvæmda fljótlega á næsta ári. Verða þá Íslendingar fyrstir Evrópuríkja til að koma á sameiginlegri símsvörun í barnaverndarmálum.