Undirbúningur að stofnun Barnahúss í Litháen hafinn
Fyrr í þessum mánuði var forstjóri Barnaverndarstofu beðinn að flytja erindi á ráðstefnu um geðheilbrigðismál barna í Vilnius og sitja auk þess samstarfsfund þriggja ráðuneyta: félags-, heilbrigðis- og dómsmála, um kynferðisbrotamál barna. Á samráðsfundinum var fjallað um möguleika á því að setja á laggirnar Barnahús í Litháen.Áhugi Litháena á Barnahúsi hefur varað um nokkurt skeið. Í byrjun september sl. kom hópur sérfræðinga til námsdvalar í Barnahúsi í eina viku. Á fundi ráðuneytanna kom fram að samstaða ríkir á milli fulltrúa ákæruvalds, lögreglu, lækna og barnaverndarstarfsmanna um að hrinda bæri þessum áformum í framkvæmd og var þeirri stofnun sem fer með stjórn barnaverndarmála falið að eiga frumkvæði að undirbúningi málsins. Óskað hefur verið eftir áframhaldandi samstarfi við Barnaverndarstofu í þessum efnum.
Til fróðleiks má geta þess að í Svíþjóð og Danmörku eru starfshættir íslenska Barnahússins til skoðunar hjá ráðuneytum sem hugsanleg fyrirmynd breytinga þar í landi og hefur ýmsum fyrirspurnum verið beint til Barnaverndarstofu af því tilefni. Fyrir dyrum standa nokkrar ráðstefnur í báðum löndunum þar sem starfsmönnum Barnahúss og Barnaverndarstofu hefur verið boðið að flytja erindi á.
